"أنا ضد التنمر".. حملة لمناهضة والقضاء علي التنمر في المدارس

"أنا ضد التنمر".. حملة لمناهضة والقضاء علي التنمر في المدارس

تعليم الصغار ليس بالأمر السهل، ولكنها مهمة تقع على عاتق الجميع في المجتمع، الأسرة أولَا ثم المؤسسات التعليمية، لذا فمنظمة اليونيسف والاتحاد الأوروبي، أطلقت حملة "أنا ضد التنمر"، للتوعية وحماية الأطفال في المدارس، وتعليمهم السلوكيات الصحيحة، واحترام الآخر.  

يشارك موقع "ستات.كوم"في حملة "أنا ضد التنمر" لتعليم الاطفال السلوكيات الصحيحة في المدارس..

أنا ضد التنمر

التنمر

التنمر هو توجيه إيذاء لشخص عن قصد، وتكرار توجيه الإيذاء للشخص ده، والمشكلة دي بنشوفها كتير في المدارس والتمرين أو أتوبيس المدرسة نفسه لذلك ستات دوت كوم بتشارك حملة أنا ضد التنمر

أيه هي أشكال التنمر؟

حملة أنا ضد التنمر هدفها تعريف اشكال التنمر. التنمر مش شرط يكون بدني، يعني مش شرط أنه يكون بس حد زق ابنك أو ضربه، لأ ممكن يكون كمان لفظي، أنه يستهزأ به أو يشتمه، أو يتريق عليه أو يفشي سره بهدف إيذائه أو إيذاء الآخرين، وممكن يكون نفسي، أن أنا ألوم حد، أو أهدد حد، أو استغله بأني أخد منه فلوسه، أوحاجاته، أو أطلب منه يعملي حاجة، فيكون مضطر أنه يعملها لاتقاء شري. التنمر من المشكلات الكبيرة اللي بتواجه الأطفال، ومش مجرد دلع أو هزار الأولاد مع بعضهم، لأن ابنك مش مضطر أنه يستحمل حاجة زي كدة سواء في المدرسة أو النادي، هو محتاج منك أنك توقفي معاه، وتوقفي التنمر اللي بيتعرض ليه. التممر ده ممكن يؤدي لمشاكل نفسية عند الطفل كبيرة جداً، وممكن توصل في الآخر للانتحار، مش لازم يكون وجهاً لوجه، دلوقتي بقى بيحصل على السوشيال ميديا، أو الشات ممكن الأولاد يتعرضوا للإيذاء من الأشخاص عن طريقهم. شجعوا أولادكم أنه لو اتعرضوا للإيذاء أو شافوا حد بيتعرض لده يصارحكم أو يصارحوا أي حد كبير سواء كان في المدرسة أو النادي. 

كيفية التعامل مع التنمر 

من خلال حملة أنا ضد التنمر ستات بتقولك ان الشخص اللي بيمارس التنمر هو شخص ضعيف، وممكن كمان يكون أتمارس عليه التنمر قبل كدة، في المدرسة أو حتى في البيت، أن الأهل بيمارسوا عليه سلطة معينة، ومش بيدوله رأس، وحازمين بزيادة معاه، وده اللي بيخلي الولد كرد فعل أنه يطلع التنمر ده على حد تاني.   هو بيعمل كدة عشان عايز يحس أنه مهم، وقادر يسيطر على حد تاني، أو عايز يحس أنه مشهور، ويتشهر في المدرسة قدام زمايله على أنه الحد الجامد اللي مفيش زيه.   ممكن التنمر كمان يكون لفظي بالتريقة أو الشتيمة إو إفشاء الأسرار، أو حتى السوشيال ميديا، ولازم ناخد بالنا كويس أوي من الحاجات اللي أولادنا بيتفرجوا عليها، سواء كان على التلفزيون أو السوشيال ميديا و دة مهم و جزء من حملة أنا ضد التنمر.   لأن فيه حاجات بيتفرجوا عليها بيكون فيها تنمر حد بيتريق على حد، والناس بتضحك عليه، فده بيشجع الأولاد أنهم يقلدوه، وبيفتكروه فعل كويس، وبيعملوا كدة حاجة ظريفة، وهيخليهم يبانوا جامدين قدام زمايلهم لما يقلدوا البرامج المشهورة دي.

ازاى اعرف ان ابنى بيتعرض للتنمر

ستات دوت كوم من خلال حملة أنا ضد التنمر بتعرفك باهم 5 اعراض:

  • التوتر، أنه بقى دائماً متوتر، قلوق
  • مبقاش يتبسط من حاجات زمان كان بيتبسط منها.
  • نومه متغير، يعني بينام زيادة عن الأول أو أقل من الأول.
  • أكله متغير بقى ياكل أكتر من الأول أو أقل من الأول.
  •  في أماكن معينة مش عايز يروحها أو أشخاص معينة مش عايز يشوفها، ومش راضي يقول ليه.  

 ازاى اتعامل مع ابنى 

  حملة أنا ضد التنمر بتنصحك تقربي من ابنك بطريقة غير مباشرة، ومفهاش لوم ولا عتاب، ولا تعلي صوتك ولا تتعصبي عشان تشجيعه يتكلم، هو عايز حد يديله الأمان ويحاول يساعده.   ممكن تحكي له حكاية أن ابن واحدة صاحبتك كان بيتعرض للتنمر في المدرسة، وحصل كذا كذا، فتلفتي انتباهه، وتعرفيه أنك فاهمة الموضوع ده، وأن الموضوع ده كبير، ووجهي له أسئلة يعني أنت لو مكانه كنت هتعمل ايه، والأحسن أنه يتصرف إزاي، وأفهمه أن اللي بيتعرض للتنمر مش غلطان، اللي بيعمل التنمر هو اللي غلطان. ممكن تقوليه أنه يروح لحد كبير في المدرسة أو في النادي، أو حد من أهله، مش شرط الأب أو الأم ممكن الجد أو أي حد بيحب يتكلم معاه، الفكرة كلها أنه يفتح قلبه ويتكلم، عشان حد يقدر يساعده، وينقذه من التنمر ده، لازم نشجع أولادنا أنهم دائماً يتكلموا من خلال التواصل الفعال. 

أنا ضد التنمر ٢

 حملة  أنا ضد التنمر

حملة #أنا_ضد_التنمر، شعار رفعه كافة المؤسسات، لتعليم الأطفال السلوكيات الصحيحة في المدارس، حيث أطلقها المجلس القومي للطفولة والأمومة حملة لمناهضة التنمر في المدارسبالتعاون مع وزارة التربية والتعليم ومنظمة اليونيسف وبدعم من الاتحاد الأوروبي تحت شعار#أنا_ضد_التنمر 

أهداف حملة أنا ضد التنمر

وشملت حملة "أنا ضد التنمر"، منشورات تعريفية على وسائل التواصل الاجتماعي، كما تخللها بعض الفيديوهات التوضيحية، إلى جانب مشاركة العديد من الفنانين المشهورين، كان أبرزهم النجم أحمد حلمي، والذي تعرض لواقعة تنمر في صغره، وكشف عنها من خلال الحملة. كما تضمنت الحملة تقديم خدمة المشورة التليفونية مجاناً من خلال، خط نجدة الطفل 16000 وذلك من خلال استشاريين متخصصين في مثل هذه الحالات، كما يتم استقبال بعض الحالات التي تستدعي لإجراء عدد من جلسات الدعم النفسي من خلال غرفة للمشورة النفسية الصديقة للطفل بمقر المجلس القومي للطفولة والأمومة. 

anti bullying1

حماية الأطفال

السيدات أيضًا عملن على تعليم أطفالهن السلوكيات الصحيحية في المنازل من خلال حملة أنا ضد التنمر، بأنه لا يجوز التقليل من شأن الآخر، ولا ننبذ حد ونقول مش هنصاحب حد ، ولا نتفق على حد ولا نشارك في أي نوع من الأذية لحد خاصة لو حد مختلف شكلا أو دراسيا أو ظروف اجتماعية أو مادية، أو لو جديد في المدرسة، فالأمر به اهتمام عالمي، لانتشاره وخطورته التي من الممكن تؤدي لجرائم أو للانتحار، لذا فلا بد من لتوعية لنحمي ولادنا ولنحمي المجتمع، المجتمع افتقد كتير من الرحمة والإنسانية ، لازم كل واحد يعمل اللي عليه.

 bullying

انتشار الحملة بين الأطفال

تخطت حملة أنا ضد التنمر11 مليون مشاهدة على وسائل التواصل الاجتماعي، ولاقت استحسانا وصدى واسع بين الأطفال أنفسهم، وهو ما يعد الهدف الأساسي من الحملة والذي يتمثل في الوصول إلى كل طفل سواء متنمر أو متنمر به لوقف تلك الظاهرة التي لها آثار سيئة على الأطفال قد تؤدي إلى الانتحار.

 وصلت عدد الاستشارات من الأطفال إلى ما يقرب من 150 استشارة على مدار يومين منذ إطلاق حملة أنا ضد التنمر في الإذاعة والتليفزيون.

مقالات مشابهة


التعليقات

ضعي تعليقَكِ هنا

التقيمات

;