إزاي تستعيدي رشاقتك بعد الولادة؟

إزاي تستعيدي رشاقتك بعد الولادة؟

آخر تحديث : الأربعاء ١٣ مارس ٢٠١٩

المحتويات

الأمومة هي حلم كل أنثى بتتولد به، لكن ازاي تستعيدي رشاقتك بعد الولادة ، والتغيرات اللي بتحصل في الجسم بعد الولادة من الأمور اللي بتقلق كتير من الستات، وبتخليهم يضطروا يأجلوا قرار الخلفة. خلينا متفقين أن الجسم بعد الولادة مش بيرجع لطبيعته تماماً، بس الأكيد أنك هتقدري تفقدي الوزن الزائد اللي اكتسبتيه أثناء الحمل، وترجعي جسمك لأفضل صورة ممكنة. ودي مجموعة من الأمور البسيطة، اللي هتساعدك تستعيدي رشاقتك بعد الولادة:

1- الرضاعة الطبيعية

فيه اعتقادات كتير أن الرضاعة الطبيعية بتسبب تشوه شكل ثدي الأم، ولكن اللي أغلب الناس ميعرفهوش أن الرضاعة الطبيعية بتساعدك على التخلص من الزيادة في الوزن اللي حصلت أثناء الحمل. لأن أثناء فترة الرضاعة الطبيعية الجسم بيحرق السعرات الحرارية لإفراز اللبن في كل مرة الأم بترضع طفلها الجسم، والجسم تقريباً بيحرق حوالي 500 سعر حراري في اليوم الواحد طول فترة الرضاعة.

كمان أثناء الرضاعة بيتم إفراز هرمون الأوكسيتوسين، واللي بيساعد الرحم على استعادة حجمه الطبيعي قبل الحمل، وبيتم إفراز هرمون تاني اسمه البرولاكتين، واللي بيحفز على إنتاج اللبن، وبيقلل من تخزين الدهون في الكبد.

فمتقلقيش من الرضاعة الطبيعية، وحاولي ترضعي طفلك على الأقل من 4-6 شهور بعد الولادة، عشان تخسري وزنك الزائد.

2- نظام غذائي صحي

متتطمعيش بعد الولادة أنك تفقدي الوزن بشكل سريع، وتعملي رجيم قاسي، لأن أولاً الأم أثناء فترة الرضاعة شهيتها بتكون مفتوحة بشكل كبير، ثانياً أنتي محتاجة تاكلي أكل فيه كل العناصر الغذائية اللي جسمك وطفلك محتاجينها أثناء الفترة دي وده هيسهل عليكي تستعيدي رشاقتك بعد الولادة. عشان كدة فقدان الوزن البطيء ده أكتر حاجة هتساعدك تخسري كل كميات الوزن الزائد، وترجعي لوزنك قبل الحمل.

أول شهرين بعد الولادة مش هتكوني قادرة تعملي أي نوع من الريجيم عشان كمية اللبن متتأثرش، ومتخليش جسمك ياخد أقل من 1500 سعري حراري في اليوم، لأنه بيكون في الفترة دي في حاجة للطاقة عشان يتغلب على التغيرات اللي مر بها بعد الحمل والولادة، وممكن بعد كدة تتبعي نظام ريجيم، بحيث تقدري تخسري مثلاً نصف كيلو من وزنك كل أسبوع.

ركزي في النظام الغذائي ده على الأكلات الغنية بالعناصر الغذائية زي البروتينات والألياف والفيتامينات المفيدة للجسم، وفي نفس الوقت ميكونش فيها سعرات حرارية أو دهون كتير، وده من خلال وجبات في أوقات مناسبة، ووجبات خفيفة وصحية بينها، عشان تتغلبي على شعور الجوع المستمر خلال فترة الرضاعة. رشاقتك بعد الولادة

3- التمارين الرياضية لاستعادة رشاقتك بعد الولادة

التمارين الرياضية مش بس هتساعدك تخسري كميات الوزن الزائد، لأ دي كمان هتساعدك على شد الجسم، وتستعيدي رشاقتك بعد الولادة والتخلص من ترهلات البطن بعد الولادة، والحصول على بطن مسطح وأرداف مشدودة. ينصح دائماً أن الأم تبدأ ممارسة الرياضة بعد 6 أسابيع من الولادة، لكن لو كنتي متعودة على ممارسة الرياضة أثناء الحمل، أو الولادة كانت طبيعية تقدري تمارسي الرياضة بعد أيام قليلة من الولادة. خلي البداية مع تمارين بسيطة زي المشي مثلاً 30 دقيقة لمدة ثلاث مرات في الأسبوع، بعد كدة زودي التمارين دي تدريجياً واعملي تمارين جديدة زي تمارين الدفع والتمدد.

رشاقتك بعد الولادة

خدي بالك لازم التمارين دي تعمليها تحت إشراف الطبيب، وهو اللي يحدد لك امتى تبدأي التمارين بالظبط بعد الولادة، ومقدار التمارين اللي حالتك الصحية تقدر تستحملها، وخصوصاً أن المفاصل والأربطة بيحصلها ارتخاء لمدة تتراوح بين 3-5 أشهر بعد الولادة.

خدي بالك كمان أن الحمل ممكن يسبب تشققات في عضلات البطن نتيجة تمددها، والتشققات دي بتستمر لمدة تتراوح بين 4-8 أسابيع، عشان كدة قبل ما تعملي تمارين البطن لازم تتأكدي أنه مفيش تشققات في العضلات.

رشاقتك بعد الولادة


التعليقات

ضعي تعليقَكِ هنا

التقيمات

مقالات مشابهة