3 وصفات للمكرونة تعرفي عليها

3 وصفات للمكرونة تعرفي عليها

آخر تحديث : الجمعة ١٥ يوليو ٢٠١٩

طريقة عمل المكرونة بالبشاميل

المكرونة بالبشاميل مشهورة في كل البيوت، وهنقدمها لك على مطبخ ستات دوت كوم بوصفة سهلة وبسيطة. أولاً هنسلق المكرونة، وهنحط لها ملح بس أثناء السلق.

اللحمة العصاج

وفي الوقت نفس هنعمل لحمة مفرومة عصاج، هنجيب لحمة مفرومة ونحطها في الحلة ونسيبها تنزل المياه منها خالص، وبنضيف عليها بصلة بالملح والفلفل بتكون متبلة فيهم، وقبل ما بنضيف البصلة بنكون مشوحينها شوية، ونسيبهم يستوا مع بعض. هنحط اللحمة على المكرونة، في ناس بتحب تعمل المكرونة طبقات طبقة مكرونة وطبقة لحمة، بس أحنا هنمزجهم مع بعض.

البشاميل

في ناس كتير بتواجه مشاكل مع البشاميل سواء كان بيطلع تخين أو خفيف، بس أحنا هنعمله بطريقة هتخليه يطلع مظبوط. هنحط 3 معالق زيت في حلة على النار، وبنحط معلقة دقيق على كل كوبايا لبن عشان البشاميل يكون مظبوط، ومش هيكلكع كدة خالص. وفي طريقة تانية للبشاميل أننا نحط الدقيق على اللبن ني في ني ونقلبهم مع بعض لحد لما الدقيق يدوب خالص جوة اللبن، ونبتدي نحطه على النار. هنحط معلقتين دقيق ونقلبهم كويس، أهم حاجة أنهم يدوبوا في الزيت كويس عشان البشاميل ميكلكعش، وبعدين هنضيف كوبايتين لبن، وهنحط ملح وفلفل، هنقلب كويس، ونسيبه لحد ما يغلي، وممكن تضيفي موزاريلا عليه أو كريمة زي ما تحبي. ودلوقتي هنضيف البشاميل على المكرونة، ممكن تحطي الموزاريلا على البشاميل وهو على النار، أو على المكرونة فوق الوش. هنحط المكرونة في الفرن على درجة حرارة 180 حوالي ساعة إلا ربع، وبعد كدة هتكون جاهزة على التقديم.

طريقة عمل النجرسكو

المكونات

  • مكرونة مسلوقة
  • فراخ "ممكن نسلق الفراخ أو نشوح الفراخ في الحلة من غير زيت أو سمنة لحد ما لونها يتغير، ونحط لها ملح وفلفل وتوم بودرة وبصل بودرة، وربع كوبايا مياه تستوي فيه الفراخ.

الخطوات

بنحط المكرونة وعليها الفراخ، ممكن تزودي مشروم متشوح أو فلفل ألوان، وممكن تعملي المكرونة طبقات أو تدمجي المكونات كلها مع بعض. وبعدين في الآخر هنحط البشاميل على المكرونة. ندخل المكرونة في الفرن على درجة حرارة 180 حوالي ساعة إلا ربع، وهنتابعها لحد ما وشها يحمر، وبالهنا والشفاء.

طريقة عمل الكانيلوني

الكانيلوني ممكن يتحشي باللحمة المفرومة أو شاورما الفراخ واللحمة، أو السبانخ. فيه نوعين كانيلوني: المواسير الجاهزة اللي بنشتريها او أن أحنا نعمله كريب

المكونات

"عجينة كانيلوني ¾ كوبايا دقيق ¾ كوبايا لبن بيضتين ملح فلفل ومعلقة زيت هنضرب المكونات مع بعضها في بولة، وفي طاسة نقطة زبدة هنعملها، ولما يتحمر جنب واحد منها هنقلبها الناحية التانية. الصلصة بنحمر توم في زيت، ونحط عليهم كوبايا مياه، ومعلقة صلصة، وملح وفلفل ونسيبها تتسبك. لحمة عصاج. موزاريلا بشاميل

الخطوات

هنفرد الصلصة على الصينية من تحت، وهنجيب الكانيلوني وهنحط عليه اللحمة، والبشاميل ونلفه، ونحطها في الصينية، هنحط البشاميل من فوق الوش، والموزاريلا. هندخل الصينية الفرن، وأهم حاجة يكون سخن، لغاية لما الجبنة تسيح عليه.


التعليقات

ضعي تعليقَكِ هنا

التقيمات

مقالات مشابهة