6 حاجات متعمليهاش وأنتي في السينما

6 حاجات متعمليهاش وأنتي في السينما

الفرجة على الأفلام في السينما لها متعة خاصة، وتعتبر الفسحة الأساسية لكتير من الناس سواء كان في الويك آند أو الإجازات والأعياد. بس خدي بالك في السينما لازم تراعي أنك مش بتتفرجي على الفيلم لوحدك، وفيه ناس كتير حواليكي، عشان كدة فيه بعض الحاجات اللي لازم تتجنبي تعمليها، وفي إتيكيت معين للتعامل في السينما لازم تكون عارفاه كويس جداً.   وبنقدملك مجموعة من السلوكيات اللي لازم تتجنبيها أنتي وصحباتك وأنتوا في السينما:  

1- التأخير

متتأخريش عن ميعاد الفيلم، وحاولي تروحي قبل ما بيبدأ بفترة كافية، بحيث تعرفي تقعدي في المكان المخصص ليكي، من غير ما تسببي أي إزعاج للناس بعد ما الفيلم ما يبدأ، وتضطري تعدي من قدام كراسيهم، وتلزقي فيهم. واعملي حسابك أنه في فترات الأعياد والمناسبات السينما بتبقى زحمة وبيكون فيه طوابير للدخول، فحاولي توصلي السينما بدري شوية. ولو وصلتي متأخر مش لازم تقعدي في مكانك بالظبط، واقعدي في أول كرسي فاضي يقابلك.

2- الحوارات الجانبية

متحاوليش تتكلمي خالص مع صحباتك والفيلم شغال، ولا حتى تقولي أي تعليقات على الفيلم وأنتي بتتفرجي عليه، حتى لو الفيلم مش عاجبك، واحترمي اللي حواليكي، وحقهم في أنهم يكملوا فرجة على الفيلم في هدوء، وخصوصاً أن الفيلم اللي مش عاجبك، ممكن هما يكونوا مستمتعين به.

حاجات متعمليهاش وأنتي في السينما حاجات متعمليهاش وأنتي في السينما

وخدي بالك الهمس بيسبب إزعاج أكتر كمان من الكلام، وبيشوش تركيز الموجودين حواليكي على الفيلم.

3- الكلام في الموبايل 

طبعاً الكلام في الموبايل والفيلم شغال أكيد ممنوع، وكمان اظبطي موبايلك قبل ما تدخلي السينما على silent mood لأن صوت رنة الموبايل هتسبب إزعاج شديد للموجودين، كمان هتفصلهم، وتتقطع تركيزهم واندماجهم مع الفيلم، وده طبعاً هيضايقهم، وممكن تسمعي منهم عبارات توبيخ أنتي في غنى عنها.

حاجات متعمليهاش وقت الفيلم حاجات متعمليهاش وقت الفيلم

حتى لو فكرتي تخرجي وتردي على الموبايل برة، هتضطري تعدي من قدام ناس كتير، وممكن تخبطي حد وأنتي خارجة، وخصوصاً أن الدنيا ضلمة في السينما، وبالتالي هتسببي لهم إزعاج أكبر بكتير من لو رديتي على المكالمة وأنتي في مكانك، ولو مستنية مكالمة ضرورية اطلبي أن مكانك في السينما يكون في طرف الصف. مش معنى كدة ان الشات بالكتابة مسموح برده، وده لأن ضوء شاشة الموبايل بيزعج كل اللي قاعدين وراكي حتى الصف الخامس، وخصوصاً أن السينما بتكون ضلمة تماماً، ومفيش غير ضوء الفيلم، وضوء الموبايل بيشتت تركيز الناس اللي وراكي، فبلاش منه.

4- اصطحاب الأطفال الي السينما 

يفضل أنك متجبيش أطفالك معاكي السينما، الا لو الفيلم فيلم للاطفال، لأنهم هيحسوا بملل طول الفيلم، وهيبتدوا يتحركوا ويتكلموا وممكن كمان يعيطوا، ويسببوا إزعاج كبير لكل اللي موجودين في السينما.

حاجات متعمليهاش وقت الفيلم حاجات متعمليهاش وقت الفيلم

5- تناول المأكولات بصوت داخل السينما 

حاولي تختاري المأكولات اللي تناولها مش بيصدر عنه صوت عالي، يعني اللب مثلاً بيسبب إزعاج، وبيشتت انتباه اللي حواليكي عن الفيلم، برده نفس الأمر بينطبق على الشيبسي والمقرمشات.   وممكن تاكلي فشار لأنه الصوت اللي بيصدر أثناء تناوله أقل، أهم حاجة أنك تشتري الفشار قبل ما تدخلي السينما، عشان ما تعديش قدام الناس أثناء مشاهدة الفيلم، وتسببي إزعاج لهم، وتجنبي تماماً أنك تصدري أي صوت وأنتي بتاكلي أو تشربي أي حاجة .

حاجات متعمليهاش حاجات متعمليهاش

6- إلقاء الفضلات

بعد الأكل ما ترميش حاجة على الأرض، حطي أي فضلات في كيس بلاستيك، وارميه في أي سلة قمامة بعد خروجك من القاعة ، واتأكدي من أن تحت الكرسي بتاعك نظيف، ومفيش أي ورق أو فضلات مرمية على الأرض.

مقالات مشابهة


التعليقات

ضعي تعليقَكِ هنا

التقيمات

;